細個讀書嗰陣學校成日搞埋啲廢物利用比賽，男同學十個有九個都係砌機械人，冇計啦，話晒機械人係男人的浪漫吖嘛～當年為咗要儲材料，不知食咗幾多杯麵同雪條?！不過出到嚟，冇一隻係郁得㗎囉⋯⋯喂，用廢物整係咁上下啦！你咁叻，你整吖！

最近就有網友Post咗段片，有人用旺仔飲品罐砌咗好多唔同嘅「機械人」，雖然唔算好高階，但係至少都叫郁得呀係咪？

睇住旺仔跟住個beat係咁上下上下咁chok，呢個動作真係令人好害羞呀！仲要強行插入⋯⋯張卡落部自製ATM度，銀仔就跌晒出嚟喇，真係好偉大嘅發明呀，唔知用八達通得唔得呢？

旺仔果然係好腰好腎好男人呀！邊個話撐艇係用臂力㗎？你睇下旺仔手臂好似條繩咁幼，但係靠條腰都可以撐到咁行，就知腰力對撐艇幾重要啦～月尾扒龍舟，黨就靠晒你喇旺仔！

你喺呢件傑作入面睇到啲咩呀？係愛呀旺仔！阿哥踩住滑板鞋都不忘拉住個細佬向前衝，等細佬感受下速度與基情呀！令毛毛諗起細個阿哥踩單車，都不忘特登勾住毛毛件衫，肯肯定係想幫毛毛跑快啲，唔係想令毛毛＿街咁＿街嘅！

仲有呢個拉麵嘅旺師傅度係咁揈條嘢，講緊佢條麵呀，仲長過啲乜乜拉絲呀。不過拉還拉，可唔可以唔好咁望住人笑，笑到人哋心都寒埋啫。毛毛仲好似隱隱約約聽到佢問： 「你要唔要實一條呀？」呃⋯⋯都係唔好客氣喇。

不過呢段片嘅精粹笨唔係旺仔，係啲背景音樂呀！所以毛毛極力推介，要開埋聲睇呢段片，先知道呢個系列嘅旺仔金剛幾有強勁嘅節奏感，簡直同章魚城一樣係中國之寶呀！

封面圖片及資料來源：土味老爹／微博