自古貓奴同主子嘅關係就唔係表面睇咁和諧，喵星人同人類為咗捍衛自己嘅地盤各出奇謀，爾虞我詐，真係夠拍一套宮心計呀！其實人類又點敢背叛主子呀，搞咁多嘢都係為主子好啫，你知啦，屋企危機四伏，唔係度度都啱主子入去玩㗎。

人類你以為裝道門就有用咩？以喵星人嘅超高智慧，打開一道門簡直Easy Job啦～撳抵個門柄咪得囉！即係咁，奴才話晒都係善於使用工具嘅朋友，梗係唔會咁易就認輸啦！

有日本網友就將個門柄打棟咁裝，睇怕主子唔會識向左扭向右扭咁開門喇啩！似乎呢個方法都唔錯，但係都好似未夠穩陣⋯⋯

一於將個門柄換做水龍頭，咁主子咪肯肯定唔識開囉！不過呢個設計，唔好話主子嘅，客人嚟到見到都唔知點開好呀！應該向邊度扭呢，會唔會扭完有啲不明液體流出嚟㗎？

原來係將成個水龍頭向左扭就開到門喇！真係好Amazing呀！開道門都搞到好似密室逃脫嘅機關咁，至醒係你啦！

「明明同廁所嗰個一樣樣㗎，點解會喺道門度又冇水出畀朕飲嘅呢喵？」

主子望住個水龍頭都唔知畀咩反應好呀⋯⋯今次畀你呢個愚蠢嘅人類考起?！不過唔緊要，主子仲有必殺技，就係賣萌嘞！其實主子你想要咩，叫奴才拎畀你咪得囉，使乜自己開門入去拎吖～

封面圖片及資料來源：sn_mar30／twitter