男人要有膊頭有腰⻣，仲要講得出做得到，咁先算係真正嘅男人！特別係對住女人，誠信真係好重要㗎。唔好以為發下噏風氹佢哋，過咗一排啲女人會唔記得，女人對於承諾特別好記性㗎，應承咗佢哋啲嘢冇做，簡直係玩命嘅行為呀！

呢位老竇就好明白呢個道理嘞，你睇佢高大威猛，又留鬚又紋身咁粗獷，點解會帶住隻BB公仔去超市入貨㗎？咪就係衰口快快囉！

是咁的，呢位偉大嘅老竇有兩個小朋友，都係由佢照顧嘅～有日佢煮緊嘢食忙到一頭煙嗰陣，阿女居然問爸爸聽日係咪會帶佢隻寶貝公仔四圍去喎。男人嘅嘢，喺上半身唔得閒思考嗰陣梗係咩都答好㗎啦，點知咁就瀨晒嘢喇！

阿女仲話公仔冇衫啱著，叫老竇順便幫公仔買齊衫褲鞋襪?，最緊要係影多啲相返嚟畀阿女睇呀，老竇今次真係老貓燒鬚喇。

冇法喇，鬼叫你應承咗個女咩，頂硬上喇！係呢啲時候，好多老竇都可能會扮晒嘢搵個膠袋入住隻公仔，行去超市買完嘢，求其影幾張相交差咪算囉～

樣樣都咁隨便，邊度有人畀面㗎！話晒阿女當正公仔係佢個仔，即係自己個外孫啦，點都要鍚住佢嘅～所以其他人嘅目光，老竇一於少理，當個公仔係堅BB咁放喺購物車度，綁埋安全帶，出發！

老竇唔止帶呢個公仔外孫去買嘢，仲怕外孫肚餓，又買芝士波，又請佢飲汽水?！喂阿哥，BB食呢啲嘢好似唔多健康啵。不過算啦，阿爺係縱小朋友啲㗎喇～BB記得返到去唔好話畀媽咪知呀～

終於買好衫仔襪仔喇！阿B著返套靚衫之後，望落係醒咗喎～上面仲寫明唔要Baby Food要Burger?，細細個就咁識食，大個做硬食家啦！

至於點解會有人知道呢件事？原來帶住公仔去shopping嘅老竇太鮮明太出眾喇！就好似漆黑中嘅螢火蟲咁，所以連超市職員都忍唔住問佢做咩事，好彩人哋聽完個故仔冇當佢係怪叔叔咋，職員姐姐仲係FB度讚佢，跟住佢個Post就畀人瘋傳嘞，見群情洶湧，老竇咪焗住出嚟現身說法囉～

一個大男人可以不顧形象，帶住個BB公仔四圍行，仲要阿女唔係身邊都做足一百分，當正公仔係真BB咁鍚，呢啲咪就係愛之嘛～相信阿女第時大個睇到老竇為佢做過呢啲傻豬嘢，一定好冧啫！

封面圖片及資料來源：Love What Matters