嗱，香港而家就踏入夏天吖，咁即係天氣相反嘅南半球而家就開始轉涼啦⋯⋯

天氣變凍，人類就話著多件衫就得啫，但流浪毛孩仲邊度有人幫佢哋著衫呀？巴西某個巴士站嘅職員就見天氣開始凍，驚狗狗凍親，所以開放個站畀啲狗狗入去避寒呀！

睇到呢度你實會問，乜巴西唔係熱帶氣候㗎咩？毛毛讀得書少啫，但係唔會呃你嘅（好似係）！巴西咁大，而家講緊嘅係巴西南部喎，咁冬天梗係會凍啲㗎啦，呢排夜晚仲跌到得十零度?咋！

巴士站職員除咗幫狗狗準備水同食物，仲用舊車呔同被整咗幾張軟綿綿又暖笠笠嘅狗床畀狗狗瞓?！睇狗狗瞓得咁冧，張床實好舒服頂喇～

其實好多流浪嘅毛孩喺冬天唔好話搵個地方避寒吖，搵啖飯食都難呀。好彩呢幾隻狗狗遇到咁好心嘅巴士站職員，最緊要一班同事又肯配合佢，真係好難得㗎。

如果係喺香港，唔好話冬天搵個地方畀流浪狗避寒吖，就算只係希望啲人平日見到唔好亂咁趕走佢哋，或者唔好傷害佢哋都唔容易啦⋯⋯都係嗰句，「可以不愛，但請不要傷害」。如果香港有多啲人好似巴西呢班巴士站職員咁就好喇！

封面圖片及資料來源：FabianeRosa