家陣搭地鐵做後生嘅仲邊敢坐低吖！橫企掂企，識企梗係揀個有得挨嘅位嚟企啦～順便喺個車窗度望下風景同廣告，?下有咩新戲上同咩新產品出吖嘛。

不過企呢個位都好大風險㗎，除咗換邊開門嗰陣會畀衝入車廂嘅人撞餐死，仲好考你心臟承受能力?！你知啦，而家啲廣告咁出位，地鐵啲廣告又要停低嗰下先見到係咩，如果咁啱係啲恐怖嘢，真係會嚇到個心肝仔卜卜跳㗎！

X！呢位阿伯想點呀，失驚無神喺個窗度出現，真係嚇死寶寶喇！佢仲要好似望住你笑咁，笑到你心都寒埋呀⋯⋯

就連其他網友都話好似睇緊進擊的巨人咁呀，你睇佢個表情同大細真係100%Match！咩大細，梗係講緊個口啦！

唉，人哋呢個廣告本來好正面㗎嘛，個主題叫「Work and Smile」， 呢位伯伯仲大有來頭㗎，佢就係當年同Steve Jobs一齊創立蘋果電腦嘅Steve Wozniak喇，嗱嗱嗱，呢幅相咪影得佢幾卡哇依囉～

其實嗰幅廣告相就咁睇都冇咩嘢吖，邊個會諗到喺架列車上面睇會變咗咁驚嚇先得㗎⋯⋯不過係架車度見到伯伯咪算好囉⋯⋯

你唔諗下當年喺車上面見到俊雄啲人仲驚呀陰功！拜託，做廣告嘅朋友，下次設計地鐵燈箱嗰陣考慮下列車上面嘅人嘅感受好嗎？

封面圖片及資料來源：1Workha／twitter、RocketNews24