小朋友最可愛嘅地方，就係無論你講嘅嘢幾不可思議，佢都會信㗎！好似你同佢玩摵走佢個鼻，佢真係會以為自己冇咗個鼻就爆喊㗎！其實小朋友嘅信任係唔可以隨便欺騙㗎，雖然佢哋畀你呃到嗰個反應係好可愛，但係如果喺佢哋嘅生命留下永不磨滅嘅陰影就唔好啦～

淨係話畀小朋友聽，呢個咁靚嘅姐姐其實係男仔，就足夠摧毀佢純潔嘅童年啦！呢位網友係一名專業偽娘，就連講嘢把聲都學足女仔㗎～

有日佢扮完女仔返屋企，準備沖涼落妝嗰陣，見到5歲嘅外甥喺度，咁就梗係要帶外甥入房玩啲新奇有趣又好玩嘅遊戲㗎啦！係拎部新出嘅Nintendo Switch畀小朋友玩呀～回復男兒身之後，外甥就問佢頭先個靚姐姐去咗邊嘞？

下，啱啱落晒妝，啲嘢喺浴缸度喎⋯⋯網友為咗唔好破壞佢對靚姐姐嘅幻想，唯有同外甥講，姐姐喺嗰浴缸入面溶咗呀！

嘩，真係好偉大呀！但係網友，你覺唔覺咁講仲恐怖過話畀外甥聽你就係靚姐姐呀？聽到兼見到靚姐姐溶咗喺水度，得返啲衫同頭髮，小朋友爆喊咗成粒鐘呀陰功！舅父呀舅父，你咁同外甥講，下次再畀佢撞到你個偽娘look點算呀？你想嚇死寶寶咩！

你不如都係keep住個偽娘look同小朋友玩，等佢大個先話佢知個真相啦！話晒舅父靚女成咁，話唔定外甥大個咗會話「不管你是男的還是女的都可以，因為你很可愛」呢！

封面圖片及資料來源：kitigai_dayo／twitter