馬路如虎口，揸車嘅人就梗係想出入平安㗎啦。所以好多人都會喺嗰車頭度掛返啲符、觀音同風車之類嘅嘢保下平安嘅～仲有啲人會喺車尾掛返啲裝飾，令架車靚啲之餘，整得夠心思嘅話仲分分鐘係網上爆紅?啵！

好似之前就有人見到巴斯喺人哋車尾救緊胡迪，真係成個反斗奇兵個畫面出晒嚟呀！自從有人咁做之後，大家都多咗留意人哋車尾，睇下有冇意外驚喜呀嘛。

呢位日本網友就係揸揸下車嗰陣，離遠見到前面車尾有條紅色嘅旗幟喺度飄揚喇！好挑釁下喎，司機分明想撩人過佢車啫！

網友正準備頭搖又尾擺咁畀啲顏色司機大佬睇，逼近架車嘅車尾嗰陣，先發現呢條紅巾嘅形狀咁特別嘅⋯⋯有啲似阿媽喺騎樓晾嗰啲⋯⋯

咪臭係阿媽係騎樓晾啲Bra囉！仲要紅中帶黑，黑中又帶紅，紅黑紅紅黑，就係咁簡單～司機大佬搞咩掛個Bra喺車尾呀？乜而家興呢味嘢㗎咩？

唉～人哋掛個Bra係車尾防撞唔通又要話你知咩！呢個Bra咁搶眼，啲人離遠見到咪唔會撞埋去囉～再唔係可能司機大佬想放個乳罩喺度求雨（乳）呢！求紅雨定黑雨？對打工仔嚟講⋯⋯最好黑啲啦。

封面圖片及資料來源：ksato0404／twitter、130markxg／twitter