眾所9知，呢個年頭經常都會收到啲自稱係乜乜乜政府部門嘅騙徒電話，只要一個不小心就會畀人昆9你。而最近，有大埔街坊就收到一個自稱係政府合署打嚟嘅電話，話叫佢拎返佢7年前報失嗰個銀包喎⋯⋯下？無啦啦拎咩銀包呀，係咪騙案嚟㗎？不過重點係，呢位街坊喺7年前又真係唔見咗個銀包喎，唔通隔咗7年都搵得返個銀包咁神奇？

於是呢位街坊就打去政府合署問多啲相關資料，點知職員竟然同佢講個銀包係喺大埔政府合署個女廁度執到嘅？喂，明明個銀包係7年前（2010年4月）喺粉嶺中心度整唔見㗎喎！呢位街坊仲話當時落緊好大雨，正當佢想收遮嗰陣就畀人撞咗一下，然後行多陣就發現自己個銀包唔見咗?！點解而家佢個銀包又會畀人喺大埔政府合署個女廁度執到咁神奇㗎呢？呢件事相當有嫌疑！

既然職員話個銀包係喺廁所度執到嘅，安全起見，呢位街坊都特登準備定手套。

另外，呢位街坊仲話喎，其實隔咗咁多年佢都唔記得自己個銀包係咩樣㗎喇，而家突然之間話畀佢知個銀包搵得返，佢呢刻個心情就好似喺產房出面等個女出世咁喎！嗚哇，到底個女係咪佢㗎呢？事不宜遲，即刻開估！

果然個銀包真係佢㗎！而且入面除咗現金同八達通之外，其他嘢都原封不動咁喺齊度?！

附上新舊銀包合照一張（左舊右新）。

資料來源：感謝網民「Kalas Chan／Tai Po 大埔」同意轉載