洗衣機真係好偉大㗎，日日都要哽啲臭到冤嘅衫褲鞋襪，然後洗返乾淨畀你喎。不過再乾淨嘅洗衣機都會有污糟嘅時候，特別係個內籠，積落好多塵同細菌㗎！

好彩而家市面上都出咗好多唔同嘅洗衣機清潔劑，咁咪唔使再下下搵人拆個筒出嚟洗囉～

話說有位台灣網友就係發現自己租嗰間屋部洗衣機唔多乾淨，於是咪搵包租婆問下佢會唔會有洗衣機清潔劑囉～包租婆唔止好快手準備咗，仲好客氣好有禮貌咁send message同網友講擺咗喺邊?！

雖然好似細盒咗啲，但係清潔劑嘅嘢，貴精不貴多吖嘛！上面仲寫明係某牌洗衣機清潔劑，去污、除黴又防臭，啱晒啦！

一打開，咦？一片片嘅？唉，而家洗衣液都搞到一粒粒啫喱咁啦，洗衣機清潔劑一片片，好出奇呀？掉入去咪會溶喺水入面囉～好似係⋯⋯

反轉佢睇睇，＿你個街呀，啤牌嚟嘅！不過網友呢啲玩慣牌嘅人 ，又點會驚呀。「清潔階段，用同花順攻擊！」但係到咗Turn End，部洗衣機都係郁都冇郁過。

其他網民就話，包租婆想叫你洗牌咋！話唔定洗完牌，仲會好似星爺咁變咗隻皺咗嘅煙士出嚟?啵。計毛毛話，好明顯包租婆就係發動咗陷阱牌，想你用生命值硬接啦！即係點？咁多要求，自己拎啲啤牌慢慢刮啲污糟嘢出嚟啦下⋯⋯

封面圖片及資料來源：aruko0729／PTT、愛評