讀書嗰陣成日想躝出街食飯，出到嚟做嘢先知有飯帶幾幸福呀！如果個飯盒仲係由妹豬為你精心準備嘅愛心飯盒，咁就真係幸福到滿瀉喇～特別係日本妹豬整嘅造型便當，真係靚到唔捨得食呀！

咦，做咩成支豉油放落個飯盒度呀？其實左手邊飯盒嗰支笨唔係一支真嘅豉油，而係用紫菜同其他材料砌成嘅飯團嚟㗎～側邊啲餸雖然冇咩造型，但係望落都好吸引呀⋯⋯

呢位日本老婆每日都會將自己整嘅愛妻便當，Post上挨豬同大家開心share，個個便當都整得精緻又逼真㗎！

嘩，咁大支力保健，老公唔使飲，睇到都充滿力量啦！話時話，呢位人妻整到啲嘢食同啲商品咁似，啲相又有咁多人like，不如賣埋廣告，收返啲廣告費幫補下啦～

產品都整得咁似，卡通人物更加難唔到佢啦。永澤同藤木嘅飯盒咁吸引，果然好卑鄙呀～仲有大大個悟空喺度嘅龍珠飯盒，完全想像到個老公喺公司打開飯盒嗰陣，隔籬位同事有幾葡萄呀！

不過老婆有啲作品都幾特別㗎，做老公嘅一打開，真係心都離一離呀！好似呢個貞子飯盒咁，食完會唔會有電話打嚟，同你講你得返七日命㗎⋯⋯

仲有呢個綠綠的飯盒⋯⋯老婆你係咪有咩暗示呀？帽事嘅！一定係Green Monday健康啲啫⋯⋯55，一定係⋯⋯

「老婆，我做錯咩你不如話我知吖，做咩要我食柔順劑呀？」

放心啦，人哋老公，雖然個便當嘅外型係特別啲啫，個飯盒冇加到真嘅柔順劑喺裡面嘅話，你應該都冇瀨到啲咩大嘢嘅，好似係。

相對起呢個日日都要食鬼嫁便當嘅人兄，柔順劑造型嘅便當真係好幸福㗎喇⋯⋯連鬼嫁便當都冇得食嘅毒L都唔好太難過，更傷心都要食飯㗎嘛，乖，快啲拎電話叫外賣啦。

封面圖片及資料來源：yuko.makotsu／Instagram、d.aiyu／instagram

延伸閱讀： 【咪得罪女人】老婆我做錯咩呀不如你直接講吖