每個屋企都總有啲祖傳秘方嘅，例如辣親要搽豉油，撞到腫咗要用鞋底捽返平佢，諸如此類啦～我地而家聽到，梗係會話冇科學根據啦，雖則話有時啲嘢都係心理作用嚟㗎啫，但係啲老人家試過覺得Work吖嘛⋯⋯

好似台灣網友個阿嫲咁，老人家就難免會腰酸骨痛㗎喇。巴斯拯救宇宙咁忙，邊得閒成日做殺龍巴斯啫。婆婆咪求其搵過第二隻牌子貼囉，貼落又幾舒服喎！

婆婆你塊膏布形狀咁特別嘅喂？仲要係棉質表層，高級嘢嚟㗎喎！呢啲咪叫潮囉～平日啲膏布四四方方又咁細塊，邊似得呢隻形狀咁特別咁貼身先得㗎？仲要超薄又有彈性?！

孫女見到之後，嚇到影相隻手都震埋呀（定笑到震呢）！叫咗你啲嘢唔好亂咁擺㗎啦，搞到阿婆拎錯嚟用喇！呢塊明明就係大膠布，止血用㗎嘛，點會係膏布啫！唔黐都黐咗啦，噴返啲藥上去敷，一樣㗎啫～

其實係你哋啲人太傳統啫～Come on James，咩年代呀？邊個話M巾同護墊係M到先有用㗎，好似呢個DSE考生咁，諗到用M巾嚟索畫筆啲水，效果真係一流㗎。

再唔係好似呢個網友，利用護墊有黐力嗰邊防水嘅特性，暫時阻止個窗漏水，真係靈感IQ稱得上十分之高超呀下！

巴打見到咁好用，係咪都有興趣買返包傍下身呢？唔使怕醜喎，而家有男性衛生巾㗎嘛，邊個話女人先用得M巾㗎啫！

封面圖片及資料來源：謝沛霖、名校Secrets、Wai Lam Tang