講到環保，好多人都淨係諗到開少啲冷氣或者將垃圾分類放入回收箱，搞到大家都以為環保一定好悶咁……其實大家做返個幼稚園小朋友，拎啲垃圾循環再用、整下手工，例如用牛奶盒整筆筒咁，都幾好玩㗎！

台灣有個網民就話佢朋友飲完盒牛奶，諗住用得唔好嘥，廢物利用下啦，於是就剪開個牛奶盒喇。點知呢個時候先發現，入面竟然有啲唔應該出現嘅嘢！估唔到牛奶盒入面會有咁大塊牛皮膠紙呀下！問題係，要剪得開個盒，即係已經飲晒成盒牛奶啦，分分鐘仲要屙埋出嚟沖埋出大海?，張膠紙又唔知黐過啲乜嘢、上面有幾多塵……真係喊出嚟呀！有請阿Sa：我想嘔呀.jpg！

大多數網民見到之後，都話覺得好驚訝、好嘔心，不過都有少少人懷疑係樓主自己黐塊膠紙入個盒度作故仔呃like嘅。毛毛淨係覺得，剪開唔係見到小強或者四腳爬爬咪算好囉……

哦……牛皮膠紙啫下話？使唔使咁大反應呀？牛皮膠紙同牛奶都係出自牛身上，咁生產過程當中唔小心跌咗入牛奶盒，都係好合理嘅事吖，嗯嗯。

封面圖片、資料來源連結：邱吆吆／爆料公社