古乳有暈，寧得罪小人，莫得罪⋯⋯冇呀，毛毛冇話係女人呀！之不過女人畀男人激親嗰陣，佢哋即刻變咗復仇勇者，用佢哋嘅創作力量同幻想諗出各種大懲罰，真係諗起都有啲淆呀⋯⋯

好似以下呢位仁兄咁，同班兄弟出去飲酒已經好危險㗎啦，居然仲夠膽約女朋友第二日晏晝出去飲嘢喎！弊在佢實在太膠估咗自己喇⋯⋯同得一班兄弟出去玩，班兄弟邊有咁易放過你吖，最後呢位阿哥清晨6點先返到屋企，然後就變咗沉睡中嘅豬腳喇⋯⋯

咁鍾意做睡公主呀嗱⋯⋯一於畀你做飽佢！女友喺呢個時候拎咗佢平日神聖不可侵犯嘅化妝品出嚟，準備玩一個大家都好懷念嘅遊戲，就係⋯⋯

幫男人化妝呀！細個玩咗咁多次，經過十幾年來嘅苦練，今日終於可以大派用場喇！

由於時間嘅關係，女友已經幫男朋友化好晒個底妝，畫埋堂眉喇～眼晴係靈魂之窗，咁梗係要幫男友化個靚靚眼妝啦！長長嘅眼睫毛，真係好迷人呀～

畫埋個性感嘅咀仔，搞掂！一個麻甩男友畀你搞到好似山水豆腐花咁，真係見到都想鍚佢一啖呀（嘔）！難為男友瞓得咁冧，全程都冇醒過呀。

女友見仲有時間，幫佢修埋甲，髹埋最潮嘅Holo色?！呢啲咁細心嘅女朋友真係去邊度搵呀⋯⋯

男友就係咁大覺瞓，瞓到第日清晨四點先起身，你實以為佢照鏡見到自己咁，會好似星爺咁嚇到問邊L個咁樣衰啦？

點知男友居然係好驚訝咁望住自己話⋯⋯原來佢扮女人都幾靚喎。睇嚟女友下次可以準備定多兩個木瓜⋯⋯55，煲木瓜湯啫。

封面圖片及資料來源：每日郵報、極點網