點解……到底點解咁快又到咗星期一呀，唔通連個天都唔鍾意我呀？心情麻麻地，最好就係食少少零食，同自己打下氣喇～會肥？算啦，不如都係食埋呢次先減啦好嘛？

真係估唔到，連食盒薯條，都可以有咁多重障礙……喂大佬，我既期待又怕受傷害咁撕開個包裝尋求慰藉，你就畀啲咁嘅嘢我？個蓋得最面嗰層撕開咗，底嗰層就依然死唔斷氣咁黐實個紙杯，你以為自己封得咁實就好叻好穩陣呀？冇用㗎！

本身想食少少垃圾食物，氹下自己開心嘅，點知就愈嚟愈灰機，你話有乜謂呢，唉，人生……呢個時候，唯有化身正能量小子，用創造力量同幻想嚇人一跳啦，等我變身先！首先喺個蓋上面開個窿仔，再加幾筆，畫隻喵星人～

再Chok幾條薯條出嚟，塞實隻貓個口，成個畫面係咪好治癒呢，仲食得又玩得，一次過滿足你N個願望呀！老套啲都要講句，有時灰到盡頭，只要轉個彎，話唔定有另一番景象呢～我而家已經充滿力量喇，聽日一定會好天嘅，你話係咪呀哈姆太郎？

じゃがりこのフタを開けるのに失敗した時の有効活用 pic.twitter.com/vcIS8Q7t5X

— からめる (@purinharumaki) May 20, 2017

封面圖片、資料來源連結：purinharumaki／twitter

睇埋：

【喊出嚟】搣咗咁耐終於都成功開到盒薯條喇

【好灰】到底我要搣到幾時先食到嚿朱古力？