唔知大家仲記唔記得日本東武動物公園入面隻痴情企鵝佬呢？話說早排動物園同hit爆嘅動畫《動物朋友》合作，喺每個動物園區都擺返嗰種動物嘅角色紙板，而最受大家注目嘅，就係企鵝區喇！

事關有隻已經廿歲（即係人類80歲喇）嘅企鵝伯伯「グレープ君」愛上咗個《動物朋友》紙牌，日日都企定定喺呢個二次元靚女身邊，食唔安坐唔落咁，嗰種求之不得，輾轉反側嘅苦戀心情，相信唔使毛毛多講，在座咁多位兵仔都好明白啦……

到底點解呢位企鵝伯伯會對《動物朋友》個紙牌一片痴心呢？可能係用佢過往受過嘅情傷有關嘅……話說十年前，企鵝伯伯仲係壯年企鵝佬嘅時候，佢同老婆仔由羽村市動物公園一齊搬過嚟，仲生埋小BB，諗住展開新生活嘅。應該有唔少人都聽過啦，企鵝奉行一夫一妻制，仔都生埋，梗係諗住白頭到老啦。

點知三年之後，佢老婆竟然跟佬走，仲生咗第二隻B，反面唔認鵝……就係咁，痴情企鵝佬就一沉不起，連同其他企鵝都冇乜互動，淨係自己一個匿埋一二邊喇。唉，個老婆拋夫棄子咁絕情，睇怕痴情企鵝佬以後聽到泡芙兩個字都冇晒胃口㗎喇。

唔知係因為塊《動物朋友》紙牌同佢個最愛生得似樣，定係令佢有返戀愛嘅感覺啦，企鵝伯伯對塊紙牌一見鍾情，但無奈對方始終只係紙牌，畀唔到咩承諾佢。見到痴情企鵝苦戀個紙牌嘅畫面已經夠心痛，而家知道埋佢嘅往事，就更加心酸呀……不過換個角度睇，鍾意塊紙牌可能都係好事嚟，起碼對方唔會呃自己，唔會跟佬走吖嘛……

封面圖片、資料來源連結：sisukaton／twitter、tobuzoo7／twitter、kandolma／twitter、Yahoo！Japan

回帶：【兵仔悲歌】痴情企鵝仔單戀《動物朋友》 角色？