騙徒嘅手法層出不窮，愚蠢嘅人類，你以為係你咁啱遇到主子咩？其實係主子揀中咗你咋！被選中嘅剷屎官，只要畀主子睇中咗，主子就會使出渾身解數，務求令你臣服喺佢嘅魅力底下㗎喇！

呢位巴西單車男叫Viitor Fonseca。有日Viiter踩緊車嗰陣，居然畀佢喺路邊見到一隻貓BB喎！於是佢即刻停車過去睇下啦，發現呢隻貓B孤仃仃，又搵唔到貓媽，咁點算好呢？一於帶佢去安全嘅地方先！

不過踩單車要用雙手㗎啵，又冇帶袋，咁點帶貓BB走呀？唔通叫貓貓自己捉實啲咩～

好彩佢係專業單車手，著住件緊身單車衣啫～最後佢將貓B攝入自己件單車衣度，果然係救貓要緊呀！

於是一人一貓就係咁樣游車河喇～難得有人類落搭，貓B梗係要趁機俘虜呢個潛在貓奴嘅心啦！貓貓成程車捉住Viiter又攬又鍚，氹到Viiter不知幾開心呀！

「見你咁好畀朕搭順風車，朕就幫你舔走啲汗啦喵～不過可唔可以揸慢少少呀喵？」

成件事真係好Sweet呀！雖然Viiter最後冇做到貓貓嘅剷屎官，但係佢都有幫呢隻貓B喺附近搵咗頭好住家㗎～算你啦喵！

事後Viiter將段片Post咗上Facebook，女士都睇到濕晒⋯⋯對眼呀，仲話想做嗰隻貓?～不過都有人話貓貓咁肉緊，其實佢可能好驚至真。Any肥，至少Viiter都將貓貓由危險嘅路邊，帶到去命中注定嘅奴才身邊吖～相信貓貓都會明白Viiter嘅心意嘅！

封面圖片及資料來源：Viiter Fonseca