日本人呀日本人，到底你哋仲要推出幾多貓貓產品先夠皮㗎？呢頭「Felissimo貓部」出完腳板底印有肉球圖案嘅貓貓花紋襪，嗰頭大阪梅田有間叫「 ブルージン」嘅麵包店又話嚟緊會推出貓形白麵包喎⋯⋯喂，你哋起勢咁推出同貓貓有關嘅產品，真係想一眾貓奴荷包乾硬化咩？

話說，繼早前東京一間麵包店推出咗兔形白麵包後，最近一間位於大阪梅田嘅麵包店「 ブルージン」都喺噚日宣布佢哋會推出一款叫「いろねこ食パン」嘅貓形白麵包！大家睇下，用朱古力醬喺塊包上面畫埋個貓樣之後幾得意～

呢款貓形白麵包喺嚟緊5月26日就有得賣喇，一袋5塊裝嘅貓形白麵包盛惠350円（大約港紙25蚊）。另外，除咗貓形白麵包之外，店內呢款貓手造型麵點都好受大家歡迎㗎！（得喇，毛毛知係貓腳，唔係貓手吖嘛⋯⋯）

有興趣嘅朋友仔咪去阪急三番街B1F買嚟試下囉。

資料來源：Hankyu Hanshin、Hankyu Hotel

睇埋：【勁可愛】東京麵包店出兔仔造型白麵包