初戀呀！我要初戀呀！個個大人都話想搵返初戀嘅味道，其實即係咩味呀？咪就係心跳、觸電、緊張、又怕怕醜醜咁囉～當年，可能大家都仲係學生，最多都係返下暑期工賺少少零用錢，想買禮物畀對方都要死慳死抵捱一個月麵包先買到，物質上唔太豐富，不過心靈上就覺得好幸福喇……

人大咗，開始有錢喇，唔係送車送樓送名牌嘅話，其實都冇乜禮物買唔到嘅，但呢個時候，先發現親手整嘅一份小禮物、一張卡仔有幾珍貴呀。

台灣就有個女朋友喺一個專畀人講男朋友壞話嘅page「靠北男友」問大家收到張咁嘅生日卡會唔會覺得好冇誠意喇。

張卡上面，公仔又冇畫，字就得幾行，仲要唔係「生日快樂」就我愛你你愛我，文筆方面又真係冇周董寫嘅詞咁浪漫嘅……不過，呢個時代，肯親手寫卡嘅男仔已經好少見㗎喇，就算幾無聊或者寫得幾樣衰，都係一份心意吖嘛，呢啲咪就係初戀feel囉！毛毛就覺得幾多紥花、幾多餐buffet都比唔上呢份真摰喇，要好好珍惜先係呀！

之前都試過有妹豬話發現原來男朋友一直都偷偷地喺筆記簿度mark低晒啲拍拖守則，包括「去邊都要報到，唔可以令女朋友擔心」、「每次有嘢食都要問咗女朋友食唔食先」咁，真係sweet到呢……愛一個人，係用心去愛，而唔係睇佢送小學雞生日卡畀你定名牌手袋畀你，連毛毛呢個大師（A0嗰方面）都知道啦！

封面圖片、資料來源連結：靠北男友

睇埋：【做壞規矩系列】原來男友偷偷地收埋咗本咁嘅筆記…