話說，倫敦一間叫「Sotheby's」嘅拍賣行嚟緊7月會拍賣一批珠寶，而其中一隻價值35萬英鎊嘅26卡鑽石戒指竟然係物主當年用10英鎊買返嚟嘅？嘩嘩嘩，乜原來呢個世界真係有咁大隻蛤乸隨街跳㗎？

拍賣行嘅負責人Jessica Wyndham話，其實呢隻鑽石戒指係物主幾十年前喺一個跳蚤市場以10英鎊（大約港幣100蚊）買返嚟嘅。呢幾十年嚟，物主都一直以為粒石賣得咁平一定係假嘢。直至最近，佢遇到一位珠寶商話畀佢知粒石有可能係堅，咁佢先識得走去拍賣行度做鑑定咋！唔鑑由自可，一鑑就發現粒石唔止唔係假嘢，仲要值成35萬英鎊（即係大約353萬港幣）咁多?！

真係估唔到一隻用10英鎊就可以買到返嚟嘅「朱義盛」原來係咁值錢⋯⋯吖，唔知當年賣呢隻戒指嘅跳蚤市場檔主知道真相之後有冇抌晒春咁呢？

資料來源：Sotheby's、BBC、The Guardian