2017年05月24日 星期三
【好人好事】伯伯未到目的地就畀的士司機放低 好彩遇到貨車暖男送返屋企
凌晨三點幾，你喺度做緊咩？瞓到隻狗咁，定係仲煲緊劇打緊機呀？成日聽人講呢，老人家唔瞓得，五六點就自然會醒，六七點就落街晨運飲茶打牙骹㗎喇，不過如果係凌晨三點幾喺街上見老人家，又會唔會早咗啲呀？
22號凌晨大約三點半，貨車司機王子康喺荃灣路見到有個伯伯喺公路慢線度行，佢擔心夜媽媽其他貨車司機睇伯伯唔到會造成發生意外，於是就即刻打死火燈慢駛，跟喺伯伯後面，默默保護佢喇。
不過行下行下，王子康就覺得唔對路，所以就落車問伯伯想去邊喇。原來伯伯本身係搭的士返梨木樹嘅，但到咗德士古道迴旋處，的士司機就話到咗，放低咗伯伯，搞到佢要半夜喺公路上面一個人步行返屋企……
睇返Google Map，顯示德士古道行到梨木樹要最少45分鐘，王子康都話估計一般人要行一個鐘頭先到，咁大家都想像到，如果伯伯真係行返屋企要行幾耐啦……
最後呢位貨車暖男義不容辭，車咗伯伯返屋企，仲將事件post上網，提醒咁多位揸夜車嘅司機要小心啲，睇清楚路面情況呀！毛毛最欣賞王子康最後個「香港人記得有時伸手幫下人」呢句，如果大家都多啲關心身邊嘅人，見到不尋常嘅事，唔好怕多事，問多句需唔需要幫忙，相信大家都會開心啲。
封面圖片、資料來源連結：感謝網民王子康／小心駕駛(討論別人駕駛態度)同意轉載
《暖男司機介紹返》
