是咁的，話說早前有韓國網民就upload咗兩張相上twitter，話喺某個停車場入面發現有人竟然無恥到將架車打橫泊，而且條友架綠色林寶堅尼仲要一架車霸咗成幾個車位咁多?！喂，哥仔你唔好咁寸好喎⋯⋯

雖然有林寶堅尼揸係幾威威啫，但「車位面前，人人平等」，理得你係林寶堅尼定小熊維尼吖，總之一架車霸多過一個車位就係唔啱啦！於是呢位網民就決定過去同車主理論一下⋯⋯點知行到埋去，車主就見唔到，淨係見到擋風玻璃入面夾咗張咁嘅紙條啫！

張紙條上面寫住：「呢座建築物係屬於我。」

哦，原來係咁呀嘛⋯⋯既然呢座建築物係屬於呢位車主嘅，咁就算呢位車主想一架車霸幾L多個車位都冇問題啦！嗯嗯，冇咩事嘅話，毛毛出返去做嘢先喇。

溫馨提示，一架車霸幾個車位嘅嘢，毛毛奉勸各位揸車人士如果冇本事好似剛才嗰位車主咁可以買起成個停車場嘅話，就千祈咪亂學嘞。如果唔係，陣間好似早前台灣呢架私家車咁搞到「世界將我包圍」就唔好啦，55。

주차장에 두 칸을 차지해놓고 '두 자리의 요금을 냈습니다'라고 써놓은 짤을 본 적이 있는데,

그것보다 더 대단한 주차짤을 발견했다.... pic.twitter.com/7Z95rVcOsh

— 블루스피카❄ (@BlueSpica0321) 2017年5月14日

資料來源：BlueSpica0321／twitter、喬喬兒／爆廢公社

睇埋：【世界將我包圍】咁鍾意一架車泊兩個車位，而家你可以慢慢泊啦！