有人話拍嘢最難就係要同毛孩拍，因為控制同預計唔到佢哋嘅行動喎。又啱嘅，毛孩又百厭又有性格，有時明明唔係到佢哋拍，佢哋都忍唔住要出嚟搶Fo，真係搞到人類頭都大埋呀！

好似俄羅斯呢個新聞直播咁，靚女主播淡淡定定報緊新聞，突然有個黑影係後面閃過喎！唔係下化，咁靈異？唔知係咪主播太專心冇留意，所以佢就繼續報新聞，直到⋯⋯

「汪」一聲，主播當堂嚇到心都離一離，四圍望下發生咩事啦，話口未完狗狗就跳咗出嚟喇！

仲要趴喺張枱度搶晒鏡，狗狗你咁樣叫主播情何以堪呢？

「我要做主播！我要同靚女主播報新聞呀汪！」

嗱，狗狗你乖啦，話晒呢度係女主播地頭，你唔好搞搞震啦好冇，最多姐姐攬下你啦，你去第二度玩啦好嗎？

原來狗狗係隔籬廠節目嘅嘉賓，唔知點解會走咗去新聞直播個廠度呀！女主播咁畀狗仔嚇一嚇，除咗笑都唔知畀咩反應好呀，但係the show must go on吖嘛，咪唯有當冇事發生過繼續報囉～

以毛毛9估，分明就係男主人知隔籬廠錄緊新聞，想借啲倚識女主播，所以先叫狗狗幫手啦！一定係咁！

封面圖片及資料來源：МТРК Мир／Youtube