話人對眼生喺額頭度，我哋會話人白鴿眼，咁白鴿腳你又聽過未呢？原來英文「Pigeon Toed」係內八字腳咁解呀。不過今次講緊呢位網友就唔係有內八字腳，而係因為佢真係有對鴿喺對腳度呀！

喺公園度特別多鴿就唔出奇吖，但係點解有兩隻寧寧舍舍唔怕人、猛咁黐住人哋對腳㗎呢？唔通呢兩隻鴿係腳膠？

真相只得一個，其實佢哋係一對鞋嚟呀！原來呢對鞋係網友特登升級大改造，用羊毛氈同其他手工料砌出嚟㗎！

做法好簡單，首先，你要準備鞋一對，然後再用?刀同發泡膠削返個頭形出嚟，再用羊毛氈篤返啲毛上去，篤完就將個鴿頭黐落個鞋踭度，再用絨布黐返對翼同啲羽毛就得㗎喇～

係咪聽落好易呢？聽就梗係易啦，都係嗰句，睇片睇食譜嗰陣都覺得味餸好易整㗎，但係落手整嗰下先見真章吖嘛。要一塊一塊咁黐啲絨布做羽毛，真係少啲耐性都唔得呀。

新鞋落地就梗係要影下相啦，於是網友就帶埋對鞋去上野公園度搵埋啲鴿一齊影喇～放喺側邊真係以為有兩隻鴿企喺網友身邊呀！

「咕咕，臥底任務非常成功，唔止啲鴿，就連隔籬阿伯好似冇發現我哋呀咕咕。」

大佬呀！大對腳喺上面穿晒崩，你咪當阿伯傻至得㗎！阿伯餵鴿見到你都唯有笑而不語呀。至於其他鴿⋯⋯人哋個頭細啲你真係當人哋冇腦咩，見有嘢食咋，如果唔係睬你都有味呀。

雖然臥底任務有啲失敗，但係途人見到咁得意都特登影低網友對鞋，網友Post咗對鞋上Twitter都有唔少人Like?，至少呃like任務成功吖，一於去食返隻乳鴿慶功！

封面圖片及資料來源：Daily Portal