好多人話靚仔冇本心，其實宅男都未必個個都有㗎 。有宅男至死不渝咁愛死一個女團或者動漫女主角，都有宅男係貪新忘舊，出咗新番就唔記得舊愛啦！嗚⋯⋯原來將舊愛嘅周邊放埋一二角，或者放上網拍賣都未算係最慘呀⋯⋯

是咁的，有日本網友想朝早釣個靚魚啦。成日聽人話夜晚釣魚好邪，咁朝早釣冇事喇啩？點知一係唔釣， 一釣起真係嚇到一褲都係呀！

浮屍呀！不過係Figure唔係人，咁都冇咁驚⋯⋯你以為啦！一擰轉個公仔⋯⋯

嘩！Annabelle咁嘅款呀！邊個咁冇陰功呀？唔愛都唔使掉佢落海㗎，搞到人哋好似中咗面目全非腳咁，連身份都辨認唔到呀。

好在有其他有愛嘅網友搵出佢本來嘅真面目，原來就係《化物語》嘅八九寺真宵呀！一個可愛嘅小蘿莉，就係咁畀人毀咗喇⋯⋯

你睇下佢個樣幾重怨念⋯⋯好似對住你講「我會返嚟搵你㗎」咁呀⋯⋯呢個肯肯定係啱啱畀車撞瓜嘅八九寺嚟啫，嚇毛毛唔到嘅！網友你放心啦，八九寺做咗神㗎喇，你咁好人救咗佢上嚟，佢應該會保佑你嘅⋯⋯應該。

封面圖片及資料來源：guardian_natu／twitter