「斷片」通常都係形容啲人飲醉酒失憶，發生咗啲乜L嘢都唔記得嘅狀態。其實就算唔飲酒，我哋都成日會好似跳Fuse咁突然諗唔起啲嘢㗎啦！以下幾個微斷片情況，睇下你中幾多個！

徵狀一：沖沖下涼唔記得自己唧咗沐浴露／洗頭水／護髮素未。

發作原因：沖緊涼唱歌唱到高潮⋯⋯位，或者太專心諗嘢諗到唔知去咗邊。

出現頻密度：間中

毛醫不專業意見：沖涼做乜諗嘢呀？專心啲沖啦！再唔係你將三pat嘢溝埋做一pat嘢，一劑搞掂晒，咁咪唔會唔記得囉！（脷伸：毛毛連噚日有冇沖涼都唔係好記得⋯⋯）

徵狀二： 出咗門口落到街（甚至上埋車之後）唔記得自己有冇熄爐熄冷氣

發作原因：太順手做咗個動作，或者真係唔記得咗

出現頻密度：頗多（朝早返工未瞓醒嘅打工仔情況尤其嚴重）

毛醫不專業意見： 呢個時候最緊要係心理輔導自己，諗定最壞嘅情況。冇熄爐會點呀？咪高溫燒滾了我一切，到時管理處打畀你咪知自己冇熄爐囉。咁冇熄冷氣又點呀？咪開足全日囉！電費呢家嘢，月尾嘅事，月尾至算啦⋯⋯

最重要嘅係，你都上咗車啦⋯⋯通常呢啲情況有9成都係自己嚇自己啫，冇事嘅⋯⋯應該。

徵狀三： 唔記得咗自己想講咩

發作原因： 朋友突然神速轉topic

出現頻密度：視乎朋友數目（好似毛毛呢啲冇朋友嘅，症狀相對輕微）

毛醫不專業意見： 呢啲情況唯有諗返上一句自己講咩，睇下諗唔諗得返下一句啦～不過通常呢啲情況，你都係諗緊啲九唔搭八嘅嘢⋯⋯呢個時候最好就係⋯⋯呃⋯⋯毛毛頭先想講咩呢⋯⋯

是但啦！通常可以唔記得嘅嘢都應該唔係重要嘢嚟嘅，咁咪記得先再講囉！

徵狀四：記得自己拎起個電話有嘢想做，但又唔記得做咩

發作原因：拎起個電話碌碌下畀其他app分散咗注意力

出現頻密度：成L日都係咁

毛醫不專業意見： 明明想開Email，點知就碌咗去挨豬同Facebook，跟住就唔記得自己想做咩啦！唔得咁㗎，一於Del晒啲App佢！咁咪一定唔會再畀佢哋誘惑到，可以專心做嘢囉！

但係毛毛頭先好似係想Check Facebook㗎喎⋯⋯咁都係當我冇講過喇⋯⋯

其實間中斷下片又有咩好怕喎？之但係如果呢啲情況越來越頻密，就可能表示你最近太大壓力喇。平日返工做嘢OT都已經咁辛苦啦，偶然自己一個人嗰陣斷下片7下，咪恥笑下自己囉！唔使樣樣嘢都要逼自己咁完美嘅，你已經做得好好㗎喇！