話都冇咁快就嚟到五月尾，考下你呀，咁六月有咩特別日子呀？

諗下先……明明我記得六月冇紅日㗎喎，有咩咁特別先？

唉，多數孝子孝女都唔知點解母親節嘅時候就隆重其事，又送花又親自煮飯又錫錫媽咪影相（呃like），但一講起父親節就大家都想問下講緊第二個定第三個唔知星期六定星期日……

母親節有送禮物畀媽咪，冇理由父親節又唔送嘢畀老竇咁大細超嘅。相信唔少人細個嗰陣都都親手畫過揼骨券畀爸爸㗎喇，真係經典中嘅經典嚟呀！送禮物冇話一定要送貴嘢先叫孝順嘅，老套啲都要講句，物輕情義重吖嘛。

大個仔喇，仲送手畫揼骨券好似冇乜霸氣喎！不如就送呢張銀紙揼骨券啦！一拎出嚟，老竇既驚又喜，係咁話「收返埋啦收返埋啦老竇夠錢使㗎喇」，但就一路暗爽收起張券，冷靜落嚟一睇先知，乜原來係揼骨券嚟嘅喂！隨住失落而嚟嘅，係心頭一絲溫暖，你細個幫佢揼骨嘅畫面湧晒出嚟。嘩，一張紙仔就可以令老竇情緒又上又落，好波！

有網民仲受到啟發，整埋胸部按摩劵出嚟，不過就梗係唔係叫你送畀老竇啦（你按埋我嗰份啦大佬），當情人節禮物就正喇！Btw，有冇人知點解要分左右？呢家嘢毛毛經驗值真係零……

揼骨券呢家嘢由細送到大，雖然係sweet，不過你唔悶老竇都可能想話坐按摩椅仲舒服囉。唔緊要，毛毛幫你諗好一系列實用券送畀老竇！

收口券

係人都知老竇有幾多堅持㗎啦，明明同佢講咗19幾次衛蘭唔係盧宛茵個女、《志明與春嬌》同《春嬌與志明》係兩套戲嚟，但都要企硬唔信你。有時都唔係想同佢拗嘅，不過真係忍唔住吖嘛，sorly囉……呢個時候，如果老竇出動收口券，你就唔再同佢嘈，咁咪家和萬事興囉yeha！（事實係呢啲嘢有乜好拗？）
 

幫口券

老母：「你唔好成日飲凍嘢啦，對身體唔好呀！」

老竇：「乜你而家咩都管住晒㗎啫！」

唉，你哋一人少句啦……老母話要小心身子冇錯，而家30幾度老竇飲汽水都啱！大家都咁叻，呢舖就打和啦好嘛？
 

揞口券

嗱，適用嘅情況好多，包括老竇偷食……I mean偷食煎炸垃圾嘢、手機download咗鹹片app、買完手錶報細數畀老母等等。不過由於成為同黨一但畀老母發現你都會冇啖好食，此券只可使用一次。

肩たたき券、セブンイレブンのネットプリントで印刷できるようにしました。番号：38106332　有効期限：2017/05/28です。ご確認下さい。 pic.twitter.com/Y4KbwBlsDc

— olo (@_olo_) May 21, 2017

封面圖片、資料來源連結：_olo_／twitter