去到外國見到人哋周街古蹟，係有啲羨慕嘅。換轉係香港，等個申請批得嗰樣係古蹟嚟都畀人拆咗啦～不過原來周街古蹟都未必係好事嚟㗎喎。

係英國有個羅馬拱門古蹟叫Newport Arch，平日啲人同車喺拱門下面出出入入都完全冇問題㗎，事關佢結構夠晒實淨吖嘛。但係遺跡始終係遺跡，人哋起嗰陣點知會有貨車、巴士啫，所以咪有高度限制囉～

點知咁就出事喇！有個貨車司機諗住跟住GPS就一定使命必達，安全去到目的地，所以見到拱門諗都唔諗就頭搖又尾擺咁揸入去呀！

好彩⋯⋯司機果然有豐富嘅入窿經驗，一入就feel到有啲唔妥，即刻停低落車睇睇先⋯⋯

大鑊喇，今次真的卡住了！邊個話頭入到就身都入到㗎，家陣唔出唔入咁算點先？唯有叫報警叫阿蛇嚟睇下有冇計啦⋯⋯

阿蛇果然係阿蛇，喺呢啲咁尷尬嘅毛文，佢決定⋯⋯「放棄」！Sor，係放氣先啱。而家都係爭少少啫，將四條呔放啲氣出嚟，咁咪矮啲囉！

但係好衰唔衰，居然畀BBC發現咗呢件事，仲直擊報導喺FB做Live畀大家睇呀⋯⋯今次真係瞬間變7頭，仲要畀全世界恥笑呀。

最後喺阿蛇嘅努力下，司機成功逃脫，慢慢後退出車之後就重獲自由喇～事後Check過道拱門都冇咩事，大家都冇事咪好囉。

其實今次都唔係第一次㗎喇，早喺五十幾年前，就有架貨車咁睇唔開撞咗埋去，拱門嚴重損毀，不過最後都修補得返嘅。點知十幾年前又有架貨車卡住咗喺嗰度喎，估唔到而家又嚟一架，果然人類總要重複同樣的錯誤呀下⋯⋯好心你哋就向香港某官員學下啦，人哋靠目測就準確評估到條橋有冇問題喇！

封面圖片及資料來源：BBC Radio Lincolnshire、Grimsby Telegraph