中學雞最驚就係畀同學仔笑你咁大個人仲要人湊嘅，如果15歲都仲要老竇接放學，實畀人笑到面都青呀！而美國有個老竇，唔只去接阿仔放學，仲要特登搞事令佢紅都面晒喇。

大熱天時游下水都幾開心吖，不過呢個著泳褲嘅大叔出喺學校門口就好似唔好多夾喎……咪住先，呢個咪老竇嚟？！佢趁住呢日係放暑假前一日，打大赤肋走去接阿仔放學，畀個surprise佢呀！

大佬呀你淨係著條泳褲都夠晒出位啦，仲要掛咁多獎褲喺心口揈揈下，又戴住頂綠色泳帽，一路跑一路大嗌阿仔個名，佢今次真係唔使旨意再識女仔喇……好彩呢日係學期最後一日，放完個暑假返嚟應該都冇人記得呢件事嘅，嗯嗯。

事後老竇仲要話因為太鍾意見到阿仔嘅表情，如果冇人見到嘅話，佢會咁樣做100萬次?呀！雖然老竇咁做係好kai，不過睇嚟阿仔都知佢貪玩，一早慣晒㗎喇，所以唯有乖乖地跟老竇上車啦。（唔係可以點啫……）有個咁出位嘅老竇嚟接自己放學，係就係老尷啲，不過第日諗返都係開心嘅！如果可以，毛毛都想毛父嚟接我放工呀！

封面圖片、資料來源連結：Justin Beadles、Daily Mail