間間學校都總會有頒獎典禮嘅，梗係啦，學生拎下獎，個Portfolio又靚仔啲，讀書又會開心啲，有咩唔好啫？但係美國有間學校頒啲獎，學生拎到一啲就都唔開心囉！

十三歲嘅妹妹Lizeth係薩爾瓦多裔嘅美國人，喺學校一個頒獎典禮入面，居然拎咗個「最有機會成為恐怖分子」獎呀！妹妹一睇到黑都面晒⋯⋯你可能唔明點解妹妹會咁大反應，等毛毛話過你知啦～

原來薩爾瓦多裔嘅黑幫喺美國好出名，所以好多薩爾瓦多裔人明明冇黑幫背景都會畀人當咗係潛在罪犯或者畀人歧視㗎。

再加埋早幾日英國發生咗嚴重恐怖襲擊，呢個咁嘅獎喺呢個時候頒真係一啲都唔好笑囉⋯⋯其他同學都唔好得幾多，有女仔拎咗「喊包獎」，又有男仔拎咗「預咗瞓街」獎。同學仔個個都O晒咀呀，難為在場老師仲好意思爆笑⋯⋯最後學校出咗嚟道歉，呢班老師就畀人紀律處分喇（暗爽一下先）。

其實頒獎嘅嘢都係想大家開心啫，點解唔正面啲呢？喺香港頒呢幾個獎嘅話，肯肯定令學生生命滿希望呀！

「最有機會買樓獎」

喺呢個咁難買樓嘅年代，老師居然覺得你有潛質買樓喎！拎到返屋企肯定光宗耀祖，連父母都為你而驕傲呀～分分鐘感動到喊?！

「最有機會做立法會議員獎」

對住啲成日上堂瞓覺嘅同學仔，我哋應該要用多啲包容同愛心對待佢哋。話唔定佢哋係未來嘅社會棟樑嚟㗎！你知啦，有啲尊貴嘅議員嘅工作就係開會瞓覺，同學仔只係實習定，為將來嘅工作做好準備啫！55，一定係咁！

「最有局長風範獎」

以往啲乜乜乜圖書獎勵計劃奬咁冇新意，我哋應該鼓勵同學Think Big吖嘛！特別係嗰啲喺本圖書閱讀獎勵冊寫住用一個星期就可以睇到三四十本書嘅同學，簡直就係做局長嘅材料啦～焗腸一個月都係睇三十本書咋！

其實學生可以日日都咁早起身返學，聽咁多個鐘頭書，放學仲要溫書補習做功課，再去埋興趣班同課外活動，真係好犀利㗎。一齊嚟同毛毛畀啲鼓勵一班學生哥啦，啪啪！啪啪啪！啪啪啪啪！啪啪！

封面圖片及資料來源：華盛頓郵報