夏天為大地帶來美腿之餘，都仲有一梳梳好似蕉嘅腳⋯⋯趾！

一直深信香港坊間傳言嘅毛毛最近無聊，無論坐車、食飯定行街都喺度觀察各位市民嘅二趾，究竟係二趾長過公，唔死一世窮？定係二趾長過公，最終會成功呢？毛毛喺呢個人口密雜嘅香港地搵咗50個市民做一個小小嘅普查。

（唔使數喇，得49隻腳咋，毛毛唔記得影埋自己嗰隻，sor囉。）

發現一：每5個人有1個二趾長過公 

喺毛毛嘅調查中，發現50個人入面有10個人係二趾長過公！原來總有一個喺左近～（望下你隔籬嗰個先啦！）

發現二：最誇差距9mm

二趾長過公嘅市民入面，最誇張嘅差距有9mm。

發現三：長度一樣最常見

喺普查中，二趾同腳趾公一樣長嘅，足足有24人。

二趾長過公 唔死一世窮？

其實「二趾長過公，唔死一世窮 」呢句係鄉下話嚟㗎。呢句民間傳言一個傳一個，又加多少少唔同鄉下嘅口音，結果就變成咁。實情係「二趾長過公，唔使一世窮」。其實毛毛就覺得大家應該改口為「二趾好彩長過公，輕輕鬆鬆鄧梓峰」。

根據網上資料指出，二趾長過公嘅市民追求個人獨立，性格唔單止進取，仲好有talent去搵錢，係旗開得勝嘅機會呀哈利！咁二趾短過公呢？有人話係一世做鹹蟲。哈哈，信唔信得過就唔知咯～

大家要記得，睇左腳先係睇天命，睇右腳係睇後天。所以毛毛做嘅調查都只係做左腳。（毛毛望住一堆腳趾望到就快反胃，冇咩毛毛都係返出去做野先⋯⋯）