唉⋯⋯過咗噚日端午節，又要等到十月先有紅假喇。今日返工嘅心情真係仲Blue過平日Monday Blue呀！不如飲杯Expresso提下神先啦～但係靚咖啡都唔係隨時隨地有得飲㗎，你估度度都有星巴巴呀Pat私fic咩，如果可以好似魔術師咁變出嚟就好喇～

之前有個魔術師就可以將啲奶倒入個iPad度，唔知幾時可以調返轉，喺部iPhone度倒啲咖啡出嚟飲呢？

科學開拓未來嘅時刻到喇！只要有呢個電話殻，喺電話撳一個掣就可以倒杯熱辣辣嘅咖啡出嚟喇 ，好神奇呀！典解嘅？典解嘅？

呢個魔術嘅竅妙就係個電話殻同隔籬呢包叫Mokaromi嘅咖啡包，咖啡包係用咗隔熱又防水嘅物料嚟做嘅，可以保存咖啡3個月。

最正係用法簡單，將個咖啡包一嘢插入去個電話殼度，等條嘢篤穿塊膜就得喇，毛毛意思係等條導管篤穿喺咖啡包出口位塊薄膜呀～

再Download佢個app，撳個掣等個電話殻加熱啲咖啡，煲到50-60度嗰陣，個app就會有第二個掣畀你撳，打斜部機咁就倒到啲咖啡出嚟㗎喇～

仲要設計埋隻便攜杯畀你，方便你隨時咖啡癮起就整杯飲?。不過呢個殻暫時未有現貨，淨係接受網上訂購㗎咋，而家畀住一半訂先，到9月1日就會送貨㗎喇！不過都要成港幣500幾蚊㗎⋯⋯

Any肥，對於咖啡精嚟講，可以隨時飲咖啡咁爽喎，500幾蚊都可能會買嘅。再唔係，呢個殻咁神奇，如果毛毛買咗咪可以扮晒變魔術咁請女女飲咖啡囉～溝到女嘅話，500蚊又算得係咩吖～雖然窮L連500蚊都冇⋯⋯

封面圖片及資料來源：Oddity Central、Mokase、Caters Clips