2017年05月31日 星期三
【寒已心】美國小丑酒店 係咪真係有人想住㗎…？
有啲咩人，係你明明見到佢笑，但你又一啲都唔覺得佢善良，甚至會好心寒㗎呢？除咗搭住你膊頭叫你畀心機嘅腦細，咪就係小丑囉。笑，本身就係共通語言，可以令人覺得呢個世界好美好、啲空氣好清新嘅，但如果係小丑嘅笑容呢，成件事就唔同講法喇……
而家啲酒店乜主題都有，美國就有間酒店用小丑做主題喇。一入到去，就有幾百隻小丑公仔迎賓，隻隻都望住你笑，今次真係唔慌唔開心喇喂……
唔好諗住耷低頭就冇事呀，枱面一樣有國際小丑協會嘅小冊子畀你睇，打工打到悶悶地，想轉行嘅話，咪諗諗佢囉。
叫得做小丑酒店，會唔會連房入面都有大量笑到你心寒嘅小丑㗎……講講下都真係有啲驚一打開門會有大大隻小丑坐喺床上面等緊我喎！
呼～好彩乜都冇，真係謝天謝地呀！其實部份房間係有小丑畫做裝飾嘅，不過如果客人要求，梗係都可以叫酒店遮住佢啦。
適當咁笑係好嘅，但啲小丑係又笑唔係又笑，即係點呀？虛偽囉！假面目囉！一間咁嘅酒店，係咪真係有人肯去住㗎？原來呢間小丑酒店位於LA 160公里外，荒山野嶺，貨車司機或者踩單車旅行嘅朋友邊有得揀吖，有瓦遮頭咪算囉。不過講真吖，瞓一晚街同對住啲小丑成晚，邊樣恐怖啲，毛毛都睇唔透……
封面圖片、資料來源連結：Daily Mail
