每次喺地下執到錢，又或者買完嘢走咗先發現找多咗錢，都係一次人性大考驗。究竟拎唔拎去報失又或者還返畀人好呢？雖然好多誠實嘅乖寶寶，如果見個數量比較多都會路不拾遺，但係都有啲人覺得地上執到寶就係自己㗎喎！

呢個黑人朋友Gerrell就被上天選中咗接受呢個人性測試喇。佢有日Check Email 突然發現自己個戶口竟然多咗成1200美金，即係9千幾蚊港幣呀！

無啦啦多咗成萬銀，去返轉旅行都得啦！不過Gerrell冇咁做，佢反而即刻退返錢畀對方，後來佢先知原來呢筆錢係一個爸爸過畀個女買生日禮物㗎！只係阿女個舊電話號碼咁啱畀Gerrell用咗，咁咪入錯數囉～

你實以為呢位黑人朋友實好有米，嫌錢腥呢～

其實Gerrell係一個低收入人士，湊住個5歲嘅囡囡，Gerrell媽媽仲要冇幾耐之前過咗身咋⋯⋯退款之後，Gerrell亦都冇要求啲咩回報，只係希望對方可以分享呢個故事出去。

點解？人哋梗係唔係為咗搏同情啦，係因為黑人同低收入人士呢兩個身份嘅人成日畀人歧視，所以Gerrell咪想藉住呢次機會，話畀其他人聽，就算係黑人，就算低收入，都唔一定貪錢，都可以係好人嚟㗎！

呢對父女都好守諾言，喺Facebook同Reddit將呢件事同大家分享，個個睇完都大讚Gerrell夠誠實，簡直就係佢5歲囡囡嘅最佳榜樣呀！有好多網友仲問當事人Gerrell個電話係咩，爭住捐錢畀佢，仲喺Paypal message寫咗好多鼓勵佢嘅說話，睇到Gerrell感動到眼濕濕?啵。

邊個話，忠忠直直，終須乞食㗎？雖然呢個世界有好多唔公平嘅事發生緊，但係好人一定有人識欣賞，總會有好報嘅～

封面圖片及資料來源： BuzzFeed、Melissa Trusler