作為一個稱職嘅老公，盡量滿足老婆是常識吧！最近，有台灣網民表示自己老婆一日到黑都話想食吞拿魚刺身，於是佢就特登去街市買返嚟，親自將「吞拿魚」處理好兼擺埋伴碟?。佢仲話，雖然啲刺身嘅油脂分佈唔算好均勻，不過佢都已經盡晒力咯，老婆見到應該都會好滾動嘅⋯⋯

滾就係滾，不過係「請你滾」嗰個「滾」，同「火滾」嗰個「滾」呢⋯⋯乜嘢油脂分佈唔算好均勻啫？那有油脂！你呢幾塊明明係西瓜嚟嘅喂！估唔到呢位網民竟然諗住用西瓜嚟fake老婆，真係好大膽呀！

而有網民見到呢碟「吞拿魚刺身」就建議呢位網民應先將屋企嘅利器收好，以免發生慘劇。

btw，其實樂觀啲睇，用吞拿魚嚟扮西瓜都氹到成村人去幫襯打卡啦，點解用西瓜嚟扮返吞拿魚轉頭又唔得喎？食西瓜咪仲有益仲多纖維⋯⋯有助排便呀，你今日排咗未呀？

睇多兩個食物扮嘢大法：

1）生薑條 扮 薯條

將生薑切條，然後放入雪櫃雪硬佢，最後再將啲生薑條炸到變金黃色就搞掂！大家睇下，就算將碟炸薯條放埋喺碟炸生薑隔籬都唔會穿崩，唔講以為右邊嗰碟炸生薑條係厚薯條嚟咋！

2）紙皮 扮 炸雞扒

係咁意搵兩塊紙皮黐埋沾粉落鑊炸炸佢就成塊厚切雞排咁樣，毛毛相信，呢塊幾可亂真嘅厚切紙皮應該唔到放入口嗰下都唔會知咩事⋯⋯

（溫提：整蠱涉及風險，未確定對方係咪玩得起之前請勿亂玩9人。）

資料來源：李大金／爆廢公社、kaigai-matome、四郎的黑暗料理／微博、dcard

延伸閱讀：

室友偷食薯條咁夠薑？等我用炸生薑條Fake下佢先！

【實用教學】成日畀人偷嘢食 室友整紙皮雞扒報復