細個睇漫畫雜誌，見到抽獎禮物好吸引嘅話，都真係會走去買信封郵票寄去試下㗎～諗返起都覺得自己有啲傻仔，咁多人抽邊有咁易抽到吖！不過六合彩都係咁啦，都係想用幾蚊買個希望啫。

好多人收唔到回覆都以為冇抽中自己，其實分分鐘封信根本從來都沒有寄到去目的地呀！

有間電台就係隔咗成34年先收到一個參加者嘅抽奬信呀！嘩，成34年咁耐，乜L抽獎活動都搞完啦，間電台隔咗34年都仲做緊先好嘢呀！

不過電台收完居然冇當係垃圾掉咗就算，仲要花咗成個星期時間搵返個寄件人呀！唉，隔咗成卅幾年先嚟搵人，你都抽咗得獎者啦，仲搵佢做乜呀？

原來電台想送返一份大禮畀呢個寄件人，就係送返同當年份獎品同等價值嘅2000蚊澳幣支票畀佢呀！究竟當年呢個係一個咩活動呢？

其實呢個係一款朱古力奶嘅宣傳活動，參加者只要剪低朱古力奶個盒上面張表格，填好再寄返去電台，就有機會贏到當時最hit嘅一套96隻唱片喇！

雖然遲咗34年，但係當年就算真係畀個參加者寄到封信去電台，都未必畀佢贏到啦，而家唔止當佢係贏家，仲要折現，好似仲抵咗喎！諗返起，毛毛當年寄畀校花啲信肯肯定係寄失咗，所以佢先冇覆到我頂喇，55，一定係咁！

封面圖片及資料來源：每日郵報