諗返起讀書嗰陣，讀得咁辛苦都唔知為咩。老老77，其實讀書嘅嘢有幾多出嚟做嘢之後會用得返㗎？考完試冇即刻還返晒畀先生都偷笑啦～好似數學咁，最活學活用嘅，咪就係以下呢啲毛文囉！
加減乘除－Fd子Gathering
根據毛毛非正式統計，除數可以話係對團體生活嘅人類嚟講，最重要嘅一環！因為只要多過一個人出去食飯唱K，都會啟動咗一個「掣」，就係AA制！呢個時候我哋會即刻利用除法，意圖心算計返每人畀幾錢。不過去到最後⋯⋯都係拎部電話出嚟計咗佢算罷啦⋯⋯
百分數－Shopping計折頭
Shopping嘅魔力真係好大，就算平日數學幾差嘅朋友，一到瘋狂減價嘅季節，佢哋數口會突然變得好精！仲要係用心算就可以話到折完個價錢你聽，跟住就好似上咗身咁口噏噏「好抵呀⋯⋯好抵呀⋯⋯」咁將一大堆嘢掃晒落購物籃度⋯⋯
代數－講是非
其實身邊有好多代數高手，不過只限代入個part囉⋯⋯一講親是非就又阿A又阿B，加埋CDEF都唔會亂，一陣A君加阿B君又同C君有關，然後C君最近又炒咗阿D君咁，點知D君原來係B君個邊個邊個，仲複雜過以前背嗰啲咩(x+y)(x-y)呀！
三角幾何－處理多角關係
唔好以為睇大台劇先有三四五六角戀，學子華神話齋，世界好簡單，但係人類就好複雜嘅。唔係學過三角幾何，點可以將辦公室複雜嘅感情關係圖，完美咁喺個腦入面展示出嚟呢？再唔係仲可以唱住Side Angle Side，分析下阿May、阿Paul同Peter嘅三角關係同埋某歌星同圈外女友加個三線姐仔嘅三角緋聞係全等三角形定相似三角形?～
小數－幾時唱円去日本
平時0.1定0.5邊有人會理咁多呀，毫子跌咗你班人都唔執啦～但係一聽到日圓滙率跌咗0.01，大家都會極敏感，即刻大叫衝呀！啲円跌啦，快啲唱錢，快啲去日本啦！嗰一刻真係覺得小數好重要㗎，如果唔係邊有藉口請假去日本shopping喎～
其實講完咁大輪，其他數學嘅嘢又有幾多仲記得點用吖？好似啲Log同埋啲cos、tan、sin咁，就算唔識，我哋咪又係仲生存緊～計毛毛話，好似我哋啲冇咩數學天份嘅朋友，開返科「日用數學」畀我哋，等我哋寓學習於生活，咁我哋嗰陣咪唔使讀得咁辛苦囉～好似係。
封面圖片及原圖來源：數學ETV截圖 、電影《選老頂》劇照、電影《最愛女人購物狂》劇照、方力申MV《ABC君》截圖、電影《逃學威龍》截圖、電影《嚦咕嚦咕新年財》截圖
