我揮一揮衣袖， 不帶走一片雲彩……呢首新詩係咪好熟呢？中學實讀過㗎，仲記唔記得係邊位作家嘅大作呀？好熟呀好熟呀，我記得㗎……咪徐志摩囉！以前上中文堂，每次聽到搣時溫柔咁朗讀《再別康橋》嘅時候，心入面都會覺得特別平靜，直頭平靜到瞓著咗……

但係，如果當時老師話畀毛毛知原來徐志摩係一個好幽默嘅詩人，毛毛實唔會再瞓著啫！最近有網民睇《愛眉小札》呢本徐志摩同老婆陸小曼嘅情書合集之後，發現原來徐志摩對住老婆仔，都有又搞笑又大細路嘅一面㗎！「你的丈夫摩」、「你的親摩」呢啲署名都係濕濕碎咋！

嗱，開始Level up喇！「你的愚夫摩」，現代寫法唔知係咪「傻豬老公仔」咁解呢？呢封信最後一句寫住「我要睡了，乖乖！」，唔好畀毛毛知道你原來係扮瞓覺，其實去咗睇影畫戲呀下……

而家啲人就興用疊字名，感覺親切啲sweet啲吖，原來100年前嘅徐志摩都一樣會咁叫自己㗎！嗚呀，一個男人叫自己做「摩摩」，真係好可愛呀，真係估唔到一代大詩人喺老婆面前都有咁嗲豬嘅一面啵～

「你的頂親親的摩摩」……嗯，聽到呢個名，真係夏蟲也為你沉默呀，睇唔出徐志摩你係咁嘅人呀下，叫毛毛以後仲點面對你嘅詩作呢……摩摩作為一位偉大詩人，平時都應該好鍾意吟詩作對嘅，唔知佢會唔會仲有個署名叫「吟摩」呢？

封面圖片、資料來源連結：朔望月／微博