讀大學嗰幾年辛辛苦苦咁又做present又寫paper又趕deadline又走堂（咦呢樣好似唔關事），都係為咗畢業禮當日上台拎住張沙紙，行禮畀屋企人睇嗰刻咋！但係美國呢個讀護理系嘅學生哥Jerich Marco Alcantara就慘呢，同屋企人搭地鐵出發去畢業禮嘅途中，竟然撞正訊號故障，服務受阻呀！

本身個畢業禮就朝早10點開始嘅，點知咁黑仔，撞正延誤，困咗喺車度走又走唔到。呢個時候，有位叫Nadiya Afzal嘅乘客留意到有個學生哥著晒畢業袍，又聽到佢話今次遲晒大到喇實趕唔切去畢業禮喇，於是就決定幫佢即場喺車廂入面搞一場畢業禮！

大家一秒就入晒戲，有人播歌又有人扮校長頒證書畀學生哥，真係好warm呀！

咦？無啦啦邊度搵張畢業證書畀佢呀？原來有乘客即刻用電話畫咗張證書畀學生哥，話恭喜佢正式成為護士呀！呢張證書雖然好有春田花花幼稚園風格，不過都係一份心意吖！

老實講吖，畢業禮最緊要都係營造「我個仔終於大個喇真係滾動呀」呢種感覺畀屋企人㗎啫，好彩學生哥阿爸阿媽同女朋友都在場，可以一齊見證呢場地鐵畢業禮咋！換個角度睇，而家唔使坐到老遠、用長鏡先影到個仔，可以近距離觀禮都唔錯吖！

封面圖片、資料來源連結：Nadiya Afzal、washington post