好多人見到啲成身紋身嘅人，都會先入為主覺得佢哋係黑社會或者覺得佢哋好惡。而家咩年代呀？邊個話紋身嘅人就係壞人㗎？而家紋身係fat唇嚟㗎～如果紋得有心思嘅話，仲可以氹到人開心?啵！

好似呢個大叔咁，喺個頭度紋返個瀨茄招牌米高佐敦入籃Logo，加埋頭上面粒癦，即刻成件事3D晒呀！咁而家大叔個頭咪有炒價囉？真係炒你個頭喇～

再唔係好似呢位網友咁，喺隻手度整返個跳彈床紋身仔，無聊嗰陣仲可以郁下自己隻手，睇住個人仔跳下跳下，解悶之餘又做到手部運動，正呀喂！不過小心人哋離遠見到你望住隻手傻笑，以為你係傻㗎啵。

唔跳彈床，釣下魚都幾好吖，郁下手指就可以釣魚，仲使鬼咁辛苦食三個字Lun廚，跟住9衝去中環海濱咩～不過呢條魚釣極都斷線嘅，都係拎電話釣鯉魚王好過喇 。

講起鯉魚王又點可以唔講比卡超呢～邊個畫到比卡超咁醜樣呀？哦～原來就係比卡超自己，咁動物嚟講，算畫得唔錯㗎喇～原來之前網友畀人紋咗隻崩壞版比卡超喺腳度，好彩有個靚女紋身師幫佢補鑊咋！比卡超，幫幫忙哽咗隻死貓佢啦～雖然我知你係老鼠⋯⋯

喂～胡迪，你伸到隻手咁長想拎咩呀？你愛你咪出聲囉，唔使伸到隻手咁長㗎啵～一定係想等巴斯拉你上車喇！

密集恐懼症患者注意！好人好姐紋咁多一點點喺隻腳度做咩呀？嚇死人咩～腳唔係白白滑滑好啲㗎咩？

原來係連線遊戲嚟㗎！連晒啲點點就見到隻長頸鹿㗎喇～哎吔！毛毛冇帶筆?～

老友，借支筆嚟用下吖⋯⋯都係冇嘢喇。原來又係紋身嚟嘅，分明整蠱人啫，一陣你啲同事真係伸隻手去拎又拎唔到，你叫人情何以堪呢？你咁衰，等毛毛搵人影低你Post上FB 先得！

靚女，你部相機好靚喎，借畀毛毛摸下得唔得呀？咩啫，毛毛真心想欣賞佢部相機咋，冇其他意思㗎。紋得咁似樣，目測錯咗都唔得咩～

其實紋身又有咩好怕喎，大把有紋身嘅人心地仲好過嗰啲披住西裝嘅狼啦～起碼人哋啲紋身可以帶畀人歡樂吖嘛，邊似啲人次次行親出嚟就咁多嬲嬲先得㗎⋯⋯講緊邊個？冇呀，冇講邊個呀，費事人哋又玻璃心啦⋯⋯

封面圖片及資料來源：noeloquence／Instagram、Pinterest、mirandatea／Wordpress、Eshopmall.co.uk、紋身圖案大全、Flickr、College Humor、Fstoppers