天時暑熱，有邊個唔想匿喺屋企開住冷氣、食住雪糕咁hea足全日吖？醒啦7頭，又到星期一，夠鐘返工返學喇。唉⋯⋯好想射波呀！但係請假又要醫生紙又假紙咁，唔通叫啲學生寫「高溫燒滾了我～所以未能返學」咩，畀阿媽睇到唔好話簽名吖，唔打到你跳舞都偷笑啦！
其實走堂射波嘅方法都有好多種嘅，睇你識唔識做㗎啫～好似呢班法國嘅中學生，走完堂都仲要畀老師同家長讚，真係要跟佢哋學下嘢呀～
是咁的，話說新任法國總統出巡，梗係會有一大堆人9衝去一睹佢嘅風采啦，話晒係法國史上最年輕嘅總統，仲要成功溝到大佢廿幾年嘅Miss做老婆喎，簡直就係一眾學生嘅偶像呀，難怪學生走堂都要嚟見佢一面啦！
點知呢6個學生去到先醒起，瀨嘢喇，一陣嗰堂P.E.，個阿sir好憎人遲到㗎啵！古乳有暈，高手在民間，隔籬路人甲突然講咗句，畀張假紙總統簽咪得囉！係醒喎！果然射波經驗老到係唔同啲嘅～
最難得係總統見到之後，即刻爆笑之餘，仲真係幫班學生簽呀！
於是呢張假紙畀法國總統簽名加持之後，唔止P.E. 阿sir睇到都笑到嬲佢哋唔落，就連其他老師同學都爭住話要睇，最後學校仲影印咗張假紙，貼埋喺Office度同大家開心share?！走堂走到為校爭光，你哋係得嘅！
唔講都唔記得，原來前美國總統奧巴馬都試過幫小朋友寫假紙㗎，仲要係佢自己估到小朋友係走堂出嚟見佢，所以主動問小朋友使唔使幫佢寫?啵！
這些機會⋯⋯其實香港大把啦！某國啲高官嚟親香港都搞到又水馬圍城又封路又盛，到時全公司連腦細都遲到，連封信都慳返呀！況且，畀你搵到人簽名又點呀，腦細要扣你人工嘅話，就算搵到民間特首發哥幫你簽名都冇情講啦⋯⋯唉⋯⋯
封面圖片及資料來源：路透社、JeunesMacron56／twitter、Reddit、abc News
元首親民系列：
【認真玩得】畀白宮職員用雪人整蠱 奧巴馬冇嚇親仲玩埋一份
【這些機會】加拿大靚仔總理做兒童節目 同5歲妹妹喺office玩枕頭城堡
