咇咇！各單位注意，酷熱天氣警告現正生效，天文台今日喺市區錄得33.5度，係今年最熱嘅一日呀！不過毛毛唔會咁天真嘅，氣溫呢家嘢睇怕都沒有最高，只有更高，一於留喺扮工室，用公司wifi上淘佬網睇下有咩消暑必備衫，買定幾件過夏天啦！

當氣溫高達30度：

基本上唔係著tee就背心㗎喇，唔通仲著長袖咩。件衫穿返幾個窿窿，通一通風都好嘅，不過因住阿媽以為你件衫畀蟲蛀爛咗，幫你一嘢掉咗去呀下。

當氣溫高達31度：

有啲人因為工作需要，一定要著長褲返工，真係冇陰公呀！唔緊要，好彩有呢款又睇得又涼得嘅開邊長褲，有體面得嚟又可以露下長腿，去見客sure win呀！

不過留意返，叫你著去見客啫，冇話叫你著住條長褲坐低見客。Stand up please。

當氣溫高達32度：

天氣咁熱，著泳衣出街都係好正常嘅，方便一收工就跳落游池消消暑吖嘛！最多咪笠多條褲，當上半身係緊身背心咁著囉。

當氣溫高達33度：

一般嚟講，熱嘅時候出嘅最多汗嘅位，實係背脊嘅。嗱，著返件「童貞必殺服」（即係日本早排好hit嘅大露背冷衫），咪唔怕成個背脊都濕晒囉！

成龍大哥後生嗰時都係咁著㗎咋，係咪好引人犯罪先？

當氣溫高達34度或以上：

高溫燒滾了我～一切！！！其實熱成咁，係人都想打大赤肋啦，不過廢事畀人眼望望，先要著衫啫，咁嘅情況，著咗好似冇著咁就最好喇。

毛毛真心推仲呢兩件透視裝呀，返工想保守少少，著返件背心打底又得，收工想wild返啲，直接用心口令人留下深刻印象又得，最緊要係夠晒消暑吖嘛！

真係唔好再以為毛毛老點你呀，睇下，成龍大哥著用款嚟呀！Btw，見到呢張相，唔知點解好似仲㷫烚烚過頭先……

常に時代を先取りしすぎる男、その名はジャッキー・チェン pic.twitter.com/G9RKR5UHLa

— サンノミヤン (@J0407C) February 2, 2017

封面圖片、資料來源連結： J0407C／twitter、alpacanda21／twitter、淘寶