原來今日除咗係打工仔最不願面對嘅星期一，仲係世界環境日呀！咁咪真係名符其實Green Monday囉？不過我哋一般講保護環境咪就係自攜餐具、購物袋咁囉～但係呢對夫婦真係為環保去到盡呀！

普通人有錢買幅地會用嚟做咩？仲使問嘅，梗係用嚟起樓搵錢啦！但係Malhotra先生同太太就揀咗喺印度雨林度買咗幅地喇。下，喺印度雨林買地咁得意，唔通想轉行種咖啡、粟米？

嘩，塊地好爛下啵，你哋有冇畀人呃咗呀？其實佢兩個一早就知嗰塊係荒地，特登買返嚟咪就係為咗化荒地為雨林囉～

有冇印象細個讀地理嗰陣，咪成日讀埋啲咩輪耕制，又過度砍伐嗰啲嘢嘅，個雨林咪臭係咁樣畀人搞彎晒囉⋯⋯所以佢兩夫婦就好想種返啲樹，等塊地可以重生嘞。

但係Tree Gun都唔係一日長成啦，要將荒地變成做一片綠地，需要好長嘅時間同耐性之餘，最緊要係咩呀？錢呀！所以佢哋喺1991年成立咗個禁獵區同埋管理禁獵區嘅非牟利組織，一邊種樹，一邊募捐，再透過買多啲農夫唔用嘅荒地繼續發展，而家禁獵區已經由55畝擴展到300幾畝喇！

「我感覺到，全部返晒嚟喇！」返嚟嘅，又點止係啲樹吖，仲有本來喺雨林住嘅動物呀！由一片荒地，變到充滿生氣，都係多得呢兩位有心人咋！

佢哋接受訪問嗰陣都話，有好多人都覺得佢哋咁做好黐線，但係就係因為佢哋呢份咁黐線嘅堅持，個雨林先可以回復返本來嘅真面目咋～所以話，只要知道自己做嘅事係啱嘅，對世界又有貢獻嘅話，人哋點睇又有咩所謂喎！

封面圖片及資料來源：boredpanda、SAI Sanctuary