去旅行住酒店，一入到廁所，見到摺成三角型嘅廁紙，感覺真係好治癒呀！就好似呢卷廁紙全心全意為我服務咁呀！而喺日本呢，就唔只酒店先會見到三角型廁紙，而係一般嘅廁所都會見到喇，日本人出咗名乾淨，唔通佢哋啲清潔人員都咁勤力，成日打掃加摺廁紙嘅？真係好pro呀！

不過，呢個原來係美麗嘅誤會嚟㗎！廁所咁多人去，清潔人員邊趕得切成日幫你摺廁紙啫，而真相就喺日本一間醫院張告示度喇！本身三角廁紙代表清潔人員啱啱打掃完，但係日本人著重禮儀，去完廁所就會幫手摺廁紙，覺得咁樣好睇啲。

醫院貼告示提醒大家，唔好再手多多將紙巾摺成三角型，因為大家喺廁格嘅時候即係仲未洗手啦，容乜易將手上嘅細菌帶咗落未用嘅廁紙度，好心做壞事㗎？

講開又講，其實喺屋企以外嘅地方去廁所，最好都係用自己啲紙巾最穩陣最乾淨，你冇聽過沖廁嘅時候，啲水花可以彈到6米咁遠咩？

三角折りしたら清楚だと思ってる女子達に言い聞かせたい。 pic.twitter.com/ApNmvveXLA

— にゃ一こ (@Lhn_087) May 28, 2017

封面圖片、資料來源連結：Lhn_087／twitter、aponyan2255／twitter

延伸閱讀：【驚安之廁所】成格都係廁紙 用邊卷先好呢？