平日OT已經O到天荒地老，到你返到屋企想好好享受所淨無幾嘅睡眠時間，居然聽到啲車喺窗外頭搖又尾擺兼嘈生晒，真係嬲到想打爆佢哋呀！……傻啦，刑事毀壞要坐監㗎。

正所謂，辦法總比困難多，唔係下下都係要用暴力解決問題嘅～學下阿婆咁動動腦又轉轉彎咪得囉！

呢個阿婆叫阿Jean，睇佢個look都知佢份人爆啦。佢屋企對正條馬路，如果啲車用正常速度行駛都冇咩嘅，但係好衰唔衰，嗰度揸車啲人又咁鬼鍾意片車，真係激到阿婆紅都面晒呀！

你睇佢揸住個風筒咁凶狠，唔通呢個係淘老網賣嗰啲噴火風筒？阿婆想同飛車黨一鑊熟？唔好亂嚟呀！

原來阿婆見之前法國有人用風筒扮測速槍，咁佢咪有樣學樣，睇下拎住把風筒對住啲車，啲車會唔會減速囉～點知真係有咁多傻豬豬一見到阿婆個風筒即刻減速呀！

阿婆搞咁多嘢都唔係淨係為咗自己㗎，佢話嗰頭有好多學生，啲飛車黨又成日掛住片車撩女仔，好易出事㗎嘛！咁咪唯有嚇下佢哋揸返慢啲，咁咪冇咁易出意外囉～

其實阿婆又使咩下下自己拎住個風筒企喺屋企出面，日曬雨淋咁辛苦吖，學下香港嘅慈母咁，整個人型鐵版放喺度，間中得閒先親自坐落去招呼下班友仔，咁咪仲好！

封面圖片及資料來源：每日郵報、Nottingham Post、881903.com