幾時最Feel到自己已經大個？咪係畢業嗰陣囉，突然之間唔使再返學，冇人再畀零用錢你，要返工搵錢喇！其實最感嘆嗰個都唔係你，係你老竇老媽子呀！喺佢哋心目中，你第一日返學仲好似係噚日嘅事，咁快就大個咗喇⋯⋯

美國有個爸爸用咗一個特別嘅方法嚟紀念阿女返學嘅最後一日，就係送包橙畀佢喇！送橙？家陣探病咩，畀包冇搣嘅橙畀阿女返學做咩呀？唔通想串阿女畢到業應該去還神？上面仲寫住「係時候喇，寶貝女！」加埋個喊樣喺隔籬，咩玩法呀？

打開仲盞鬼，居然除咗啲橙仲有張搣橙說明書啵！原來阿爸由幼稚園開始就會幫阿女準備每日嘅午餐，仲次次都會放個搣好嘅橙喺個飯盒入面，真係好Sweet呀！

但係阿女話咁快就大個女，唔使再返學喇⋯⋯以後阿女要自己搣橙，自己照顧自己喇⋯⋯嗚⋯⋯爸爸一諗起就濕喇⋯⋯對眼⋯⋯梗係啦，阿女仲係孻女嚟，孻女孻心肝，係特別唔捨得嘅。

嗱嗱嗱，你哋啲人實話老竇縱壞晒個女，連橙都幫佢搣埋，仲唔係公主病！唉⋯⋯其實啲女大個嫁出去之後，好彩就有老公錫，唔好彩就⋯⋯咁老竇趁個女仲喺身邊，縱佢多啲都好正常啫～

雖然爸爸而家唔使再幫阿女搣橙，但係喺老竇心目中，阿女永遠都係一個細路女，老竇永遠都係咁鍚佢嘅，話晒阿女係老竇嘅前世情人吖嘛！話時話，父親節又就嚟到，除咗搣返個橙過老竇吃，仲有冇啲咩表示先？

封面圖片及資料來源：megsullivan07／twitter、boredpanda