唔知有冇人試過呢種經歷呢，辛辛苦苦搵到間食老套小菜嘅餐館，帶阿爸阿媽去，諗住畀個驚喜佢哋，等佢哋回味下那些年啦，點知佢哋食一啖就話冇舊時嗰啲咁好食！即刻覺得佢哋幾old seafood呀，不過咁，少年，其實你都一樣㗎咋，你又何嘗唔係時時刻刻都諗住呢啲消失嘅味道呢？

士多啤梨味子母奶

原味同朱古力味子母奶平時都見得多，但係士多啤梨味你又飲過未先，仲要係膠樽＋錫紙蓋嗰隻呀！

四方果

唔經唔覺，四方果已經同我哋Byebye咗幾年㗎喇。識食一定係用飲管啜嚟食，夾硬啜到啲啫喱變到爛碎！不過雀巢話四方果較多人造色素，驚影響健康，所以停產喎。唉，毛毛最多應承你唔日日食啦，你畀返我啦……

金雞片

其實食落又鹹又口乾，不過零食嘅嘢，就係有種難以解釋嘅魅力，令你只要一開始咗第一啖，就停唔到落去！

寶路薄荷糖

薄荷冰涼芬芳，有個窿嘅薄荷糖！獨立包裝就仲有得賣嘅，不過筒裝就真係好耐冇見過喇。

奇趣杯

美味雪糕，杯杯滋味夠～下層仲有得意公仔喺裡頭～玩嘅食嘅你都有！媽咪最唔鍾意就係買奇趣杯㗎喇，佢話留咗個位擺玩具，得返半杯仔雪糕好唔抵喎，不過小朋友面對玩具，邊有抵抗力㗎啫？

角10棒

細個見到老竇買角10棒返屋企，真係興奮到跳起呀！係日本嘢呀！仲要一買就買10條，有排食，今次發達喇！毛毛隱約記得首廣告歌係好多條角10棒一齊唱「角10角10角10棒～」，但又個個同事都話冇印象，唔通真係我記錯？

巨星雪條

「朱古力彩針 + 雲呢拿 + 西瓜」呢個組合聽落怪怪地，但食落你就知出奇地夾！聽講而家有間手工雪條還原咗呢款經典味道，不過賣四五十蚊條，原來回憶真係咁矜貴㗎。

橙汁冰冰、檸檬冰冰

呢兩款雪條最吸引嘅未必係味道，而係個抽獎遊戲。大獎送車送機票，不過都唔係重點，對小朋友嚟講，抽中送雪條嘅number先係最緊要呀！中咗又食食完又中，毛毛最高紀錄就試過連送三條喇，講返起都覺得光宗耀祖，直頭要寫落cv呀。

香蕉先生雪條

呢款香蕉味脆皮雪條疑似因為包裝上嘅香蕉先造型太似陶傑而停產，令人大感可惜。

雲呢拿雪糕批

睇個樣都知好嘢啦！聽講而家喺大陸、澳門都有得賣嘅，大家出門記得尋下寶喇～

講到最後，其實我哋唔係為食，而係掛住當日嗰個有零食就會笑晒口，咁pure咁true嘅自己啫……

圖片來源：寶路薄荷糖／YouTube、奇趣杯／YouTube、雲呢拿雪糕批／YouTube