夏日熱辣辣，好熱好熱，但係睇廣告啲女女就好涼好涼～梗係啦，一到夏天，啲廣告Model換晒泳衣小背心咁，真係好清涼呀～其實香港嘅毒L都幾幸福吖，起碼冇女都有大把丁圖睇吖，換轉第二度⋯⋯

好似沙地阿拉伯咁，唔好話丁圖，就連一幅咁Warm咁Sweet嘅家庭玩水相廣告都話有問題呀！下，個個都有著泳衣泳褲，做阿媽個Model仲要唔係著三點式，有咩唔啱呀？畀張沙地阿拉伯零售公司嘅「正確」示範你睇就明㗎喇。

起碼要好似咁啦！做老竇嘅點可以同個仔打大赤膊，露晒啲「雞」肉出嚟㗎，起碼要著返件衫啦，啲女都係呀，唔可以露肉㗎。不過佢哋梗係冇睇過香港政府廣告嘞，係畫都應該畫淺色長袖衫褲吖嘛～唔係好易中暑㗎！

最慘都係阿媽， 變咗維尼吹氣波波呀！今次真係老母都畀你吹漲了。仲要個個樣都畀人打晒格仔，佢哋塊面唔係咁不雅啫？

其實喺沙地阿拉伯都唔係第一次發生呢啲超高超嘅改圖事件㗎喇，之前大家都好喜愛嘅易key牙都瀨過嘢呀，佢哋為咗就返當地極保守派嘅重男輕女文化，將Catalog上面啲女全部Key走晒呀！唉，唔通人哋咁開通，曲線支持多元成家又要話畀你聽咩？

每個地方都有佢嘅文化嘅，之前台灣播《海賊王》同香港播《冇眉娘》嗰陣夠用自己嘅方式嚟封胸啦！Between，唔知遲啲會唔會有地方請人專責拎住啲黑膠紙喺車站度幫啲廣告女郎遮返住啲事業線吖嗱？

封面圖片及資料來源：omar_quraishi／twitter、sacoksa／Instagram、Imgur、人民網、Ettoday