畢業相嚟講，最緊要就係齊人。除咗同學仔要齊，平時盡心盡力教導學生嘅老師們都當然要齊齊整整啦！之不過，你哋就話un un腳影一陣搞掂啫，但老師們一個教咁多班，要佢哋同晒咁多班同學仔影相咪分分鐘影到連簿都冇時間改？

哦，想既方便又快捷啫下話？key圖咪得囉⋯⋯

是咁的，話說最近網上流傳咗一張來自四川成都市龍泉中學嘅畢業相，唔少網民見到呢張相都話張相好靈異咁喎⋯⋯大家睇下，坐喺最前排嘅老師真係個個對腳下面都冇影㗎！嘩嘩嘩，日光日白坐喺室外影相都冇影，仲猛過元朗達德喎老友！

唔止咁，坐喺最前排嘅老師除咗對腳冇影之外，個身同啲衫褲鞋襪嘅線條亦都出奇地平滑，直頭好似用photoshop key上去咁?！唔通呢堆老師全部都係key上去嘅？

網上就有篇疑似係同學仔爆料嘅文章話，原來一眾老師只係同咗「偉大的」一班同五班影相，而其他班別嘅畢業相都係就咁key圖喎！呢位同學仔仲話：「每當回憶起高中的三年時光，再看看這些P得如此隨意的畢業照，我不知道會是怎樣的心情。」

any肥，雖然呢間中學就冇回應張畢業相有冇經過加工，但計毛毛話，其實就算啲老師真係key上去又點吖？樂觀啲睇，起碼你身邊嘅同學仔都唔係key上去吖……55。

資料來源：四川高校新鮮事兒／微博