唔好以為乜都愈新愈好呀，其實都不知幾多人鍾意儲舊嘢，不過就唔係又舊又殘嗰啲，而係時間耐得嚟又keep住新淨、冇乜畀人用過，咁就最值錢喇。就好似二手唱片咁吖，如果完全未開封，真係升價十倍㗎！

戴返個頭盔先，人人嘅口味都唔同嘅，有啲嘢喺你眼中係草，喺人哋眼中就可能係寶喇。可能你覺得個封面畫到花晒、寫滿晒字嘅二手唱片唔值錢，不過喺東京二手唱片店老闆眼中，就係好有趣嘅寶貝，仲要為佢哋開咗個小型展覽?！

呢個小型展覽會展出70張老闆用50至100円買返嚟嘅二手塗鴉唱片，等我哋率先睇下有咩特別嘅展品先！畫中史書啲古人就話上堂解悶啫，畫花唱片封面個歌手，梗係覺得有啲大嘥……

呢張貓王嘅唱片上面，就寫住佢因為心臟病突發而死喇……對一個貓王迷（包括毛毛）嚟講，見到呢句句子真係寧舍心痛……上面寫住「52.8.17」，即係昭和52年8月17日，亦即係美國時間嘅1977年8月16日， 貓王離開嘅日子。

呢張山口百惠嘅唱片就畀人大大力咁寫咗個「我」字，係喇得喇知喇，山口百惠係你㗎嘛。

呢個塗鴉唱片展覽由6月3號舉行到18號，免費入場嘅，而家次次一打開Facebook都見到實有FD子喺日本玩緊，如果你咁啱去咗東京又有興趣去睇下咪影多幾張相返嚟囉！

汚レコードトークショウ「いつもレコードのことばかり考えている人のために。」は定員に達した為応募を締切らせていただきます。
たくさんのご応募、リツィートありがとうございました。 pic.twitter.com/rfEmHBkacF

— ダウンタウンレコード (@DTR_tokyo) June 8, 2017

封面圖片、資料來源連結：DTR_tokyo／twitter、itmedia.co.jp