呢幾年香港嘅沙灘成日都堆積海量殘體垃圾，令到大家見到都好嬲豬，不過你以為海上垃圾一定係外地輸入㗎咩？真係太年輕了。

今朝早有位科大同學仔輝輝喺科大海邊發現大量日用品，包括枕頭呀、燒烤用品呀、毛毯呀咁，而呢排又係退宿嘅日子，所以就懷疑係有大頭蝦嘅同學唔小心漏低喺海邊喇……嗱，毛毛話佢哋疑似漏低咋，冇話佢哋係因為唔想搬返屋企而特登亂掉㗎！

呢個咁靚嘅海邊同科大宿舍好近，十分鐘之內就會行到。其實輝輝上星期已經去海邊執過一轉垃圾㗎喇，佢一邊睇日出一邊執垃圾，成地唔係樽就係煙頭，佢一個鐘就已經清咗兩袋一桶，辛苦過晨操?呀！輝輝話，原本以為上星期執過一轉，今個星期去會冇乜垃圾啦，點知就見到大量日用品畀人漏喺海邊……

毛毛同輝輝傾過，佢話自己好鍾意行山，見到環境畀人破壞成咁，覺得好睇唔過眼，於是就出手執垃圾。而今次呢，本身執完諗住喺Facebook post張日出相紀錄下就算㗎喇，但係見到竟然連枕頭都有，所以先貼出嚟，仲公開埋個post，希望大家有返啲公德心、守護呢片土地。

封面圖片、資料來源連結：感謝網民輝輝同意轉載